O BNG presentou unha moción para tratar no pleno do próximo venres na que se solicita a posta en marcha dunha nova gardería municipal da Guarda e a modificación da ordenanza actual para que o servizo afonde realmente na conciliación familiar.

“Ano tras ano vemos como un gran número de solicitudes quedan fóra pola falta de prazas e por unha ordenanza que non facilita a conciliación laboral das parellas, especialmente as mulleres”, comentou Ángel Baz, portavoz municipal do BNG.

Para o BNG queda claro que a actual xestión da gardería é custosa con respecto a de concellos próximos e ten un número insuficiente de prazas.

O BNG quere lembrar que no seu momento tanto o PP como o PSOE tiveron a oportunidade de traspasar a xestión do servizo de gardería municipal á Xunta de Galiza co conseguinte alivio para as arcas do concello, pero puideron máis as cuestións localistas que a prestación dun servizo mellorado.

A moción nacionalista solicita a petición á Xunta de Galiza da construción dunha gardería municipal dentro da Rede de Escolas Infantís de Galiza, para o cal o Concello da Guarda deberá poñer terreos a disposición do ente autonómico.

Para o BNG é fundamental a conciliación familiar e laboral para favorecer a fixación de poboación no concello da Guarda, polo que aumentar substancialmente as prazas públicas de gardería é imprescindíbel se queremos que a mocidade siga vendo o noso concello como un lugar onde poder desenvolver un proxecto de vida.