Rematadas as obras de reposición das beirarrúas nas parroquias de Viladesuso e Santa María de Oia contempladas no proxecto técnico de "Renovación da capa de rodadura na PO-552, treito Vigo-Baiona", desde o BNG de Oia informa e denuncian as calumnias e inxurias por parte da Axencia Galega de Infraestructuras encargada das obras deste proxecto contra o concelleiro do BNG, Xosé Antón Rodríguez "Xúster". Estes acúsano de ter impedido a relación dos traballos e ameazárono con enviarlle ás Forzas e Corpos de Seguridade do Estado e dar conta ao órgano xurisdicional competente. 

Isto responde a que no nº 189 da rúa Vista Alegre no barrio da Riña, tanto a Axencia Galega de Infraestruturas como o Concello de Oia, non quixeron atender a demanda dos propietarios da vivenda afectada. O concelleiro do BNG en Oia, atendeu aos veciños que levan desde o 2006 solicitando unha entrada digna e a eliminación das humidades que lles provoca a elevacións da beirarrúa. A resposta da alcaldesa de Oia durante os últimos anos foi ignorar as demandas dos afectados así como as citas presenciais e chamadas telefónicas. 

Por tanto, o concelleiro do BNG exercendo o seu dereito a defender os intereses de calquera veciña/o pediu que se respetara o acordado o luns 27 de setembro ás 10 da mañá. Ese día a alcaldesa de Oia, o enxeñeiro da Xunta, o vixiante de estrada, o concelleiro de medio ambiente, o encargada de obra e o concelleiro do BNG reuníanse cos veciños afectados acordando paralizar as obras nese tramo mentres estudaban a reclamación e non reanudalas sen avisar antes á propietaria da decisión tomada. 

Con todo, un mes despois comezaban de novo sen previo aviso e sen presentar solución ningunha á problemática. 

"O caciquismo semella ser o modus operandi de certas administracións, cumprindo acordos, desatendendo á cidadanía na reclamación dos seus dereitos, faltando á verdade nos plenos... e non sendo suficiente con iso: ameazando aos concelleiros da oposición por exercer os seus dereitos na defensa dos intereses da veciñanza" - comenta "Xúster". 

As obras deste proxecto levaron 966.112,17 euros só en cambiar lousas, mentres que o goberno rexeitaba a moción do BNG para a construcción de beirarrúas en Mougás e Pedornes."Malgastar case 1 millón de euros en obras innecesarias si, atender as lexítimas demandas duns veciños, non. A iso sempre se lle chamou caciquismo" - critica o concelleiro nacionalista.